صوبے کا مطالبہ آئینی حق،غداری کہنا بڑی غداری ہے، خالد مقبول

حیدرآباد (بیورو رپورٹ) متحدہ قومی موومنٹ پاکستان کے کنوینر ڈاکٹر خالد مقبول صدیقی نے کہا ہے کہ صوبے کا مطالبہ آئینی حق ہے اسے غداری کہنے والے سب سے بڑی غداری کے مرتکب ہیں، جتنا سنجیدگی سے ہم نے حیدرآباد یونیورسٹی کیلئے تین برسوں میں کوشش کی اتنا 30سالوں میں کرتے تو کئی یونیورسٹیاں بن جاتیں۔ وہ حیدرآباد کے مقامی ہال میں اربن گریجویٹ کانفرنس کے شرکاءسے خطاب کررہے تھے۔ ڈاکٹر خالد مقبول صدیقی نے کہا کہ اگر پاکستان میں زمین پر سب سے مضبوط حق ہے تو ان لوگوں کا ہے جو ہندوستان سے ہجرت کرکے یہاں آئے۔ انہوں نے کہاکہ پرویز مشرف کا دور آپ کو انگیج کرنے کا دور تھا، ہم نے پل تعمیر کرلئے لیکن تعلیم پر کچھ نہیں کیا، ٹاؤن کمیٹیاں بنالیں لیکن صوبے کے بارے میں کچھ نہیں سوچا۔ انہوں نے کہا کہ ہم سے یہ کہا گیا کہ ایم کیو ایم سے پہلے کراچی اور حیدرآباد میں بڑا سکون تھا‘ خوشحالی تھی، لاہور کے ملکر جتنے دکاندار ٹیکس دیتے ہیں اتنا صرف ایک لیاقت آباد کا لوئر مڈل کلاس ٹیکس دیتا ہے، آپکا شہر کراچی چلتا ہے تو پاکستان پلتا ہے، جو چیز بناتا ہے اس کو پتہ بھی ہے کہ ٹھیک کیسے کرنا ہے آپ کے بغیر اس وطن کا گزارا نہیں آپ بنانے والے ہیں۔ انہوں نے کہا کہ 1992ء کے آپریشن میں ہمیں پتہ چلا کہ ہمارے ٹارچر سیل بھی ہیں، خود میرے کمرے سے ٹارچر سیل نکلا تھا، کراچی میں آپریشن اسلئے ہوا کہ وہاں ترقی تھی، امن تھا۔ انہوں نے کہا کہ حیدرآباد کا قصور یہ تھا کہ اس نے ایوان میں غریب و متوسط طبقے کے لوگوں کو جاگیرداروں کیخلاف بھیجا۔کانفرنس سے خطاب کرتے ہوئے ڈپٹی کنوینر و سابق میئر کراچی وسیم اختر نے کہا کہ جو موجودہ صورتحال ہے اسکو مد نظر رکھتے ہوئے گریجویٹ فورم کو فعال کرنے کی بہت ضرورت ہے۔