ایک سال میں پاکستان کو سوا 2 ارب ڈالر ریکارڈ رقم جاری کی،عالمی بینک

10 جولائی ، 2024

اسلام آباد(مہتاب حیدر ) عالمی بینک نے مالی سال 2023-24 کے دوران 2.25 بلین ڈالر کی ریکارڈ رقم پاکستان کو جاری کی ہے، جس میں پالیسی لون کے طور پر 350ملین ڈالر شامل ہیں۔ عالمی بینک کے کنٹری ڈائریکٹر برائے پاکستان، ناجی بن حسین نے وفاقی وزیر برائے اقتصادی امور احد چیمہ اور دیگر وزارت کے اعلیٰ حکام کو بھیجے گئے ایک سرکاری پیغام میں کہا ہے کہ وہ آپ کی ذاتی معاونت اور قیادت کے ساتھ ساتھ وفاقی سیکرٹری کاظم نیاز اور ان کی ٹیم کی قیادت اور کاوشوں کو سراہتے ہیں، جس نے مالی سال 24 میں عالمی بینک کی معاونت سے چلنے والے منصوبوں کے نفاذ میں نمایاں بہتری اور ریکارڈ رقوم کے اجرا کو یقینی بنایا ہے۔پیغام میں مزید کہا گیا کہ وفاقی اور صوبائی وزارتوں اور محکموں، نیز صوبائی حکومتوں کی قیادت کو بھی ان نتائج کے حصول کے لئے ان کے مضبوط تعاون پر برابری کی بنیاد پر سراہا جانا چاہئے۔"بینک نے پاکستان میں غیر معمولی 2.25 بلین ڈالر کی رقم جاری کی ہے، جس میں دوسری مستحکم ادارے برائے پائیدار معیشت (RISE-II) ترقیاتی پالیسی فنانسنگ سے 350 ملین ڈالر شامل ہیں۔ یہ تاریخی طور پر سب سے زیادہ رقم کا اجرا ہے۔انہوں نے کہا کہ وہ اقتصادی امور کی وزارت کی پوری ٹیم اور تمام متعلقہ وزارتوں، محکموں اور ایجنسیوں، وفاقی اور صوبائی سطح پر، کو ان سنگ میلوں کے حصول میں ان کی محنت کے لئے سراہتے ہیں۔ آپ کی مثالی قیادت کے لئے شکریہ اور میں مالی سال 25 میں آپ کی رہنمائی میں جاری پیشرفت کی حمایت کے لئے کامیاب تعاون کا منتظر ہوں۔"اعلیٰ حکام کا کہنا ہے کہ عالمی بینک کی تعریف اہمیت رکھتی ہے لیکن اس کے ساتھ ساتھ ڈونر فنڈڈ منصوبوں کے اثرات کا جائزہ بھی ضروری ہے تاکہ استعمال شدہ فنڈز کے فوائد کو معلوم کیا جا سکے۔