فلور ملز کھلوائیں بصورت دیگر وہاں پڑے اسٹاک کو قبضے میں لے لیں ،چیف سیکریٹری پنجاب

اسلام آباد (رپورٹ:حنیف خالد) چیف سیکرٹری پنجاب نے ہفتے کو صوبے بھر کے کمشنروں اور ڈپٹی کمشنروں کو وڈیو لنک پر ہدایات جاری کیں کہ وہ اپنے اپنے ضلع اور ڈویژن کے فلور ملز مالکان کو فوری ہڑتال ختم کرنے پر آمادہ کریں۔ اگر وہ ہڑتال ختم نہیں کرتے تو ڈویژنل کمشنر اور ضلعی ڈپٹی کمشنرز اپنے اپنے ضلع اور ڈویژن کی فلور ملوں کا کنٹرول سنبھال لیں اور اُنکے گوداموں سے آٹے اور گندم کا سارا سٹاک بحق سرکار ضبط کر لیں۔ جنگ کو معلوم ہوا ہے کہ یہ ہدایات ملنے پر ضلع میانوالی کے ڈپٹی کمشنر نے المصطفیٰ فلور ملز کے مالک کو ہڑتال ختم کر کے مل کو چالو کرنے کا حکم دیا۔ جس پر مل مالک نے جواب دیا کہ پاکستان فلور ملز ایسوسی ایشن کے مرکزی چیئرمین عاصم رضا احمد اور پاکستان فلور ملز ایسوسی ایشن پنجاب برانچ کے چیئرمین چوہدری افتخار احمد مٹو کے کہنے پر فلور ملز پسائی شروع کر سکیں گے۔ انکے کہنے پر فلور ملز مالکان نے تیسرے روز بھی ہڑتال جاری رکھی ہے۔