معطل پی ٹی آئی رکن شیر افضل مروت کے ناقابلِ ضمانت وارنٹ گرفتاری جاری

راولپنڈی (این این آئی)راولپنڈی کی سول عدالت نے پاکستان تحریک انصاف کے معطل رکن شیر افضل مروت کے ناقابل ضمانت وارنٹ گرفتاری جاری کردیے۔شیر افضل مروت کے ناقابلِ ضمانت وارنٹ گرفتاری سول جج ڈاکٹر محمد ممتاز ہنجرا نے جاری کیے۔شیر افضل مروت کی عدالت میں عدم حاضری پر ناقابلِ ضمانت وارنٹ گرفتاری جاری کئے گئے، شیر افضل مروت کے خلاف تھانہ نصیر آباد میں راولپنڈی ڈیولپمنٹ اتھارٹی (آر ڈی اے)نے مقدمہ کر رکھا ہے۔عدالتی حکم کے مطابق شیر افضل مروت یا ان کے وکیل عدالت حاضر نہ ہوئے جس پر وارنٹ جای کیے گئے ہیں۔یاد رہے کہ شیر افضل مروت نے 2023 میں الزام لگایا تھا کہ آر ڈی اے نے ان کا گھر مسمار کردیا ہے جبکہ راولپنڈی ڈیولپمنٹ اتھارٹی نے موقف اپنایا تھا کہ شیر افضل مروت جس پراپرٹی کی بات کر رہے ہیں، وہ سکیم ہی غیر قانونی ہے، نوٹسز کا جواب نہ دینے پر مالکان کیخلاف مقدمہ بھی درج کیا ہے۔