پنجاب9اور 10محرم کوموبائل سروس جزوی طور پر معطل رکھنے کا فیصلہ

لاہور ( این این آئی)پنجاب نویں اور دسویں محرم الحرام پر موبائل سروس کہاں بند ہو گی تعین ہوگیا۔ ترجمان محکمہ داخلہ پنجاب کے مطابق پنجاب کے اکثریتی اضلاع میں موبائل سروس بحال رہے گی۔ تفصیلات کے مطابق لاہور، قصور، شیخوپورہ، سرگودھا، خوشاب، سیالکوٹ، اٹک، جہلم، چکوال، ملتان، خانیوال، لودھراں، وہاڑی، ساہیوال، پاکپتن، اوکاڑہ اور چنیوٹ میں موبائل سروس بحال رہے گی۔ اسی طرح پنجاب کے دس اضلاع میں موبائل سروس صرف جزوی طور پر معطل ہوگی۔ ان اضلاع میں گوجرانولہ، نارووال، ٹوبہ ٹیک سنگھ، بھکر، منڈی بہاوالدین، وزیر آباد، راجنپور، فیصل آباد، بہاولنگر اور حافظ آباد شامل ہیں۔ یار رہے کہ ان اضلاع میں بھی موبائل سروس صرف جلوس اور مجالس والے علاقوں میں ہی معطل کرنے کی سفارش کی گئی ہے۔ ترجمان محکمہ داخلہ نے بتایا کہ کسی بھی شہر میں مکمل طور پر موبائل سروس معطل نہیں کی جائے گی۔ ترجمان محکمہ داخلہ پنجاب نے بتایا کہ امن و امان کے قیام اور شہریوں کی حفاظت کیلئے مخصوص مقامات پر جزوی طور پر موبائل سروس معطل کرنے کا فیصلہ کیا گیا۔