نوجوانوں کیلئے ہنر و پیشہ ورانہ تعلیم میں سرمایہ کاری کیلئے پُر عزم ہیں،وزیراعظم

اسلام آباد ( نیوز رپورٹر) وزیرِ اعظم شہباز شریف نے کہا کہ حکومت نوجوانوں کے لئے جدید ہنر و پیشہ ورانہ تعلیم میں سرمایہ کاری کیلئے پُر عزم ہے،نوجوانوں کو ہر شعبہ زندگی میں ترقی اور باوقار روزگار کیلئے جدید ہنر و پیشہ ورانہ تربیت یقینی بنائینگے۔عالمی یومِ ہنر برائے نوجواناں کے موقع پر اپنے پیغام میں وزیراعظم نے کہا کہ پاکستان کے مستقبل کو روشن کرنے کیلئے نوجوانوں کو جدید ہنر سے آراستہ کرنا وقت کی ضرورت ہے۔ حکومت اپنے نوجوانوں کو جدید تعلیم، یکساں ترقی کے مواقع کیساتھ ساتھ دنیا سے مقابلہ کرنے کیلئے جدید پیشہ ورانہ تربیت سے آراستہ کر رہی ہے۔ وزیرِ اعظم نے کہا کہ انفارمیشن ٹیکنالوجی کے شعبے میں 3 لاکھ اور جدید زراعت کیلئے 1 ہزار نوجوانوں کو پیشہ ورانہ تربیت کیلئے چین بھیجنے کا اقدام ، جو ان کے حالیہ دورہ چین کے دوران طے پایا ، حکومت کے اسی عزم کا اعادہ ہے۔ وزیرِ اعظم نے کہا کہ قومی سطح پر بھی انفارمیشن ٹیکنالوجی کے شعبے میں تربیتی پروگرامز جاری ہیں جہاں سے فارغ التحصیل لاکھوں طلبا پاکستان اور پاکستان سے باہر اپنی صلاحیتوں کا لوہا منوا رہے ہیں۔