اسرائیلی فوج کے رہائشی عمارتوں پر حملے اور بمباری، 5 بچوں سمیت 15 فلسطینی شہید

غزہ/انقرہ(صباح نیوز) اسرائیلی فوج کے نصیرات میں گھر پر حملے کے نتیجے میں5بچوں سمیت11فلسطینی شہید ہو گئے۔ عرب میڈیا کے مطابق خان یونس میں بھی گھر پر بمباری سے4فلسطینی شہید اور3زخمی ہو گئے جبکہ اسرائیلی فوج نے گزشتہ8دنوں کے دوران غزہ میں5پناہ گزیں اسکولوں کو بھی نشانہ بنایا۔ علاوہ ازیں اسرائیلی فوج نے مغربی کنارے میں غزہ سے تعلق رکھنے والے ایک فلسطینی کو گولی مار کر شہید کر دیا۔ فلسطینی پناہ گزینوں کیلئے خدمات انجام دینے والے سب سے اہم ادارے انروا کے اہلکار کا کہنا ہے کہ غزہ میں گزشتہ ہفتے ہونے والے حملے اب تک کے سب سے خونریز حملے ہیں۔ عرب میڈیا کے مطابق حماس نے اسرائیلی فوج کا نہ پھٹنے والا اسرائیلی میزائل 2 اسرائیلی ٹینکوں کو نشانہ بنانے کے لیے استعمال کیا ہے۔ دوسری جانب امریکی فوج کا کہنا ہے کہ حوثیوں نے بحیرہ احمر میں 2 آئل ٹینکرز کو نشانہ بنایا ہے۔ علاوہ ازیں غزہ میں ترک فلسطین فرینڈ شپ ہسپتال پر اسرائیلی فوج کے حملے پر ترکیے نے ردِعمل کا اظہار کیا ہے۔ ترک وزارتِ خارجہ کی طرف سے کہا گیا ہے کہ اس بات کو یقینی بنائیں گے کہ حملے کی ذمے دار اسرائیلی فوج کو عالمی عدالت کے کٹہرے میں لایا جائے۔ ترک وزارتِ خارجہ کی جانب سے یہ بھی کہا گیا ہے کہ اسرائیلی فوج کا تباہ شدہ ہسپتال کے سامنے تصویریں بنوانا عالمی قوانین کی خلاف ورزی کا ثبوت ہے، ہسپتال کو فوجی اڈے کے طور پر استعمال کرنا اسرائیل کی منظم پالیسی کا حصہ ہے۔