مسجد میں فائرنگ،عمان میں پاکستانی سفارتخانے میں ایمرجنسی ہاٹ لائن قائم

اسلام آباد(صباح نیوز) عمان میں قائم پاکستانی سفارت خانے میں مسجد میں فائرنگ کے متاثرین سے متعلق ایک ایمرجنسی ہاٹ لائن نے کام شرع کردیا جہاں سے لواحقین اور ورثا رابطہ کرسکتے ہیں۔عمان کے علاقے وادی الکبیر میں مسجد میں فائرنگ کے واقعے کے بعد عمان میں پاکستانی سفیر علی عمران نے ہدایات جاری کی ہے کہ عمان میں موجود پاکستانی وادی الکبیر کی جانب نہ جائیں۔پاکستان سفارت خانہ عمان کی جانب سے پاکستانی کمیونٹی کے لیے جاری پیغام میں کہا گیا ہے کہ سفارت خانہ بروقت معلومات کی فراہمی اور زخمی پاکستانیوں کو طبی امداد کی فراہمی میں مشغول ہے۔ لواحقین صبر کا دامن ہاتھ سے نہ چھوڑیں۔عمان میں پاکستانی سفیر علی عمران نے خولہ اسپتال، ناہدہ اسپتال اور رائل اسپتال کا دورہ کیا۔ زخمیوں کی عیادت کی اور طبی سہولیات کا جائزہ لیا۔پاکستانی سفیر نے کہا کہ پاکستان سفارت خانہ عمان پاکستانی کمیونٹی کے ساتھ مکمل رابطے میں ہے۔ واضح رہےکہ امام علی مسجد میں پیش آئے فائرنگ کے واقعے کے شہداء میں 4 پاکستانی بھی شامل ہیں اس حوالے سے پاکستانی سفیر علی عمران چوہدری نے بتایا کہ عمان حکومت نے کْل 4 افراد کی شہادت کی تصدیق کی ہے۔انہوں نے بتایا کہ واقعے میں اب تک 2 پاکستانیوں کی شہادت کی بھی تصدیق ہوئی ہے۔پاکستانی سفیر نے کہا کہ سفارتی عملے کے ساتھ رات اسپتال میں موجود تھا، عمان حکام کے ساتھ رابطے میں ہوں۔علی عمران چوہدری نے کہا کہ عمانی حکام حملے کی تحقیقات کر رہے ہیں۔