ملک کو سیاسی بحران سے نکالنے کیلئے فوج کو سیاست سے الگ ہونا پڑے گا، فضل الرحمٰن

پشاور( پی پی آئی)جمعیت علمائے اسلام ف کے سربراہ مولانا فضل الرحمٰن نے کہا ہے کہ سیاسی قوتوں کے خلاف طاقت کا استعمال مسائل کا حل نہیں بلکہ اس سے سیاسی انتشار مزید بڑھے گا،ملک کو سیاسی بحران سے نکالنے کیلئے فوج کو سیاست سے الگ ہونا پڑیگا، طاقتور حلقے جتنی جلد اس حقیقت کو سمجھ جائیں ملک اور ان کیلئے اتنا ہی بہتر ہوگا، مسائل کا حل ملک میں ازسرنو شفاف انتخابات میں مضمر ہے،تمام ادارے طے شدہ دائرہ کار میں سمٹ جائیں تو ملک سنبھل سکتا ہے۔ ان خیالات کا اظہار انہوں نے ایک انٹرویو میں کیا۔ مولانا فضل الرحمٰن کا کہنا تھاکہ سیاسی قوتوں کے خلاف طاقت کا استعمال مسائل کا حل نہیں بلکہ اس سے سیاسی انتشار مزید بڑھے گا۔پی پی آئی کے مطابق انہوں نے کہا کہ مقتدرہ تسلیم کر لے کہ موجودہ ہائبرڈ نظام ناکام ہو چکا ہے، تمام ادارے آئین کے مطابق طے شدہ دائرہ کار میں سمٹ جائیں تو ملک سنبھل سکتا ہے، سیاسی بحران حل کرنے کے لیے فوج کو سیاست سے الگ ہونا پڑے گا، جب تک فوج ایسا نہیں کرتی ملک بحران سے نہیں نکل پائے گا، طاقتور حلقے جتنی جلد اس حقیقت کو سمجھ جائیں ملک اور ان کے لیے اتنا ہی بہتر ہوگا، مسائل کا حل ملک میں ازسرنو شفاف انتخابات کرانے میں مضمر ہے ۔