PTIپر پابندی کے اعلان سے پہلے ہم سے مشاورت نہیں کی گئی،شرجیل میمن

کراچی(این این آئی)سندھ کے سینئر وزیروپیپلز پارٹی کے رہنما شرجیل انعام میمن نے کہا ہے کہ پی ٹی آئی پر پابندی کے اعلان سے پہلے پیپلز پارٹی سے مشاورت نہیں کی گئی،جو آئین میں لکھا ہوا ہے وہ ہونا چاہیے۔خصوصی گفتگو کرتے ہوئے شرجیل میمن نے کہا کہ بانی پی ٹی آئی کو گرفتار کرنے کی کوشش کی گئی تو پولیس پر پیٹرول بموں سے حملے کیے گئے۔انہوں نے کہا کہ پی ٹی آئی نے آئی ایم ایف کو خط لکھ کر کہا کہ پاکستان کو پیکیج نہ دیا جائے، بانی پی ٹی آئی نے اداروں اور عوام کے درمیان نفرتیں پیدا کیں۔پیپلز پارٹی کے رہنما نے کہا کہ بانی پی ٹی آئی نے پرویز مشرف کے ریفرنڈم کی بھی حمایت کی تھی، پی ٹی آئی تحریکِ عدم اعتماد لانا چاہتی ہے تو یہ اس کا حق ہے۔انہوں نے کہا کہ مخصوص نشستوں کے حوالے سے عدالت کا فیصلہ میری سمجھ سے باہر ہے، کیا پی ٹی آئی عدالت میں گئی کہ انہیں نشستیں ملنی چاہئیں؟