پی ٹی آئی پر پابندی لگانے سے کچھ حاصل نہیں ہوگا،شیری رحمٰن

اسلام آباد (صباح نیوز) پاکستان پیپلز پارٹی کی رہنما شیری رحمٰن نے کہا ہے کہ ہمیں کوئی عندیہ نہیں تھا اس طرح کوئی کام ہو رہا ہے، میں سمجھتی ہوں پی ٹی آئی پر پابندی لگانے سے کچھ حاصل نہیں ہوگا۔ایک بیان میں شیری رحمن نے کہا ہے کہ آپ نے بجٹ میں بھی دیکھا ہم اپنی رائے کے مطابق کچھ کر نہیں سکے، ہم نے ان سے کہا تھا اس طرح نہ کیجئے ، اتحاد اس طرح نہیں چلتے۔انہوں نے کہا کہ پارٹی کا جو بھی فیصلہ ہوگا اس کے ساتھ کھڑے ہیں، کسی چیز کو آپ روک نہیں سکتے، ملک میں قانون کی حکمرانی ہونی چاہیے۔شیری رحمن نے کہا کہ جو حالات ہیں اس پر عوام کی چیخیں نکل رہی ہیں، اجتماعی دانش سے مستفید ہونا چاہیے، لوگوں سے پوچھنا چاہیے۔ پیپلز پارٹی کی رہنما نے کہا کہ ہر جماعت کو سوچنا چاہیے مسائل کیا ہیں، ملک کو مشکلات سے نکالنے کا حل دینا چاہیے۔