تحریک انصاف پر پابندی بارے عجلت سے گریز کیاجائے ،ق لیگ

اسلام آباد ( نمائندہ خصوصی ) حکومت کی اہم اتحادی جماعت مسلم لیگ ق نے حکمران جماعت کو مشورہ دیا ہے کہ تحریک انصاف پر پابندی بارے عجلت سے گریز کرے اور ان تمام قانونی پہلووں کا جائزہ لے کر اقدام اٹھائے کیونکہ کل اسے سپریم کورٹ میں پابندی کے جواز کو ثابت بھی کرنا ہوگا۔ میڈیا سے گفتگو کرتے ہوئے پارٹی کے مرکزی ترجمان وسیکرٹری اطلاعات غلام مصطفیٰ ملک کا کہنا تھا کہ تحریک انصاف پر پابندی کے متعلق چوہدری شجاعت کا مؤقف واضح ہے۔ انہوں نے کہا کہ حکومت اور اپوزیشن کو اپنی توجہ ملکی معیشت اور عوامی مسائل پر مرکوز رکھنی چاہئے اور سیاسی جماعتیں معاشی و سیاسی استحکام کی خاطر انا کی سیاست ترک کریں۔