چار ایڈہاک ججز کی تقرری کی کوئی مثال نہیں ملتی، بیرسٹر گوہر

اسلام آباد ( آن لائن ) تحریک انصاف نے سپریم کورٹ میں ایڈہاک ججز کی تقرری کی مخالفت کردی۔ چیئرمین پی ٹی آئی بیرسٹر گوہر نے کہا ہے کہ چار ایڈہاک ججز کی تقرری کی کوئی مثال نہیں ملتی، ایڈہاک ازم آزاد عدلیہ کیلئے متصادم ہے، عدالتی تنازعات سے گریز کرنا چاہیے۔ بیرسٹر گوہر نے اپنے ایک بیان میں کہا کہ 2015 سے سپریم کورٹ میں کسی ایڈہاک جج کی تقرری نہیں کی گئی،سپریم کورٹ نے اصولی طور پر فیصلہ کیا گیا کہ ’’ایڈہاک ازم‘‘ ’’آزاد عدلیہ‘‘ کیلئے متصادم ہے،ایڈہاک ججز کا تقرر اور وہ بھی چھٹیوں میں اور چار ججز ایک ساتھ تقرر کرنے کوئی مثال نہیں ملتی،چھٹیوں میں چاروں ایڈہاک ججز کی ایک ساتھ تقرری غیر ضروری ہے اور اسکی مثال نہیں ملتی،اس سے کیسز کا بوجھ کم نہیں ہوگا۔ انہوں نے کہا کہ یہ پوری سپریم کورٹ اور اسکے ججوں پر سمجھوتہ ہوگا،ایک حقیقی خدشہ یہ بھی ہے کہ اس اقدام کا مقصد پی ٹی آئی کی مخصوص نشستوں کے فیصلے اور بطور پارٹی اس کا موقف ہے،چیف جسٹس کو ایسے نازک وقت میں عدالتی تنازعات سے گریز کرنا چاہیے۔