عمران خان کا جناح ہائوس و دیگر 11 مقدمات میں ریمانڈ منظوری کا تحریری حکم جاری

لاہور(کورٹ رپورٹر) انسداد دہشتگردی عدالت کے جج خالد ارشد نے 9 مئی جناح ہاؤس جلائو گھیرائو سمیت 11 مقدمات میں بانی پی ٹی آئی کے 10 روزہ جسمانی ریمانڈ کی منظوری کا تحریری حکم جاری کردیا، فیصلے میں کہا گیا ہے کہ تفتیشی کے مطابق بانی پی ٹی آئی نے گرفتاری کی صورت میں کارکنانِ کو عسکری تنصیبات پر حملے کا کہا، تفتیشی نے وائس میچنگ ٹیسٹ، پولی گرافک اور فوٹو گرامیٹک ٹیسٹ کے لیے جسمانی ریمانڈ کی استدعا کی، بانی پی ٹی آئی کی واٹس ایپ ویڈیو کال کے ذریعے حاضری لگائی گئی، بانی پی ٹی آئی نے کہا ہے نو مئی کے سارے واقعات کی سی سی ٹی وی فوٹیجز سامنے نہیں لائی گئیں، جب مجھ پر فائرنگ ہوئی تو وہ آرمی آفیشل کے خلاف ایف آئی آر کرانا چاہتے تھے لیکن بات نہیں سنی گئی،بانی پی ٹی آئی نے کہا جب میں نے کچھ کیا ہی نہیں تو معافی کیوں مانگوں؟ بانی پی ٹی آئی کے وکلا نے جسمانی ریمانڈ کی درخواستوں کی مخالفت کی، حکم میں کہا گیا ہے کہ ملزم پر جدید ڈیوائسز کے زریعے مجرمانہ سازش پھیلانے کا الزام ہے، پولیس نے تحقیقات مکمل کرنے کے لیے وائس میچنگ ٹیسٹ سمیت دیگر تفتیش کرنی ہے، انصاف کے اصولوں کو مدنظر رکھتے ہوئے تفتیش کے عمل میں خلل نہیں ہونا چاہیئے، ملزم کو 25 جولائی کو ویڈیو لنک کے زریعے دوبارہ عدالت میں پیش کیا جائے۔