مہنگائی کی شرح میں 0.76فیصد اضافہ،29اشیاء کی قیمتیں بڑھ گئیں،5سستی

لاہور،اسلام آباد(مانیٹرنگ ڈیسک،ایجنسیاں) پاکستان میں رواں مالی سال 2024-25 کا وفاقی بجٹ نافذ ہونے کے بعد مسلسل تین ہفتوں سے مہنگائی کی شرح میں اضافے کا رجحان بدستور جاری ہے۔حالیہ ہفتے ملک میں ہفتہ وار مہنگائی کی شرح میں 0.76فیصد اضافہ ہوا جبکہ سالانہ بنیادوں پر مہنگائی کی شرح بڑھ کر 24.36 فیصد ہوگئی ہے۔وفاقی ادارہ شماریات نے مہنگائی بارے ہفتہ وار رپورٹ جاری کر دی ہے جس کے مطابق ایک ہفتے کے دوران 29 اشیاء ضروریہ مہنگی ہوئیں اور صرف 5اشیاء کی قیمتوں میں کمی واقع ہوئی ہے۔ چکن کی قیمتوں میں 10 فیصد اور پاوڈر دودھ کی قیمتوں میں پانچ فیصد اضافہ ہوا جبکہ انڈے تین فیصد جبکہ آلو اور لہسن دو، دو فیصد مہنگے ہوئے۔اعداد و شمار کی ہفتہ وار رپورٹ کے مطابق ہفتہ وار بنیادوں پر مہنگائی کی شرح 0.76 فیصد مزید بڑھ گئی، مہنگائی کی سالانہ مجموعی شرح 24 اعشاریہ 36 فیصد ریکارڈ ہوئی ہے۔