پاکستان کشمیریوں کا وکیل ہونے کے ناطے فیصلہ کن کردار اداکرے،ڈاکٹر مشتاق

مظفرآباد(صباح نیوز) جماعت اسلامی آزاد کشمیر گلگت بلتستان کے امیر ڈاکٹر محمد مشتاق خان نے کہا کہ پاکستان کشمیریوں کا وکیل اور فریق ہونے کے ناطے کشمیر کی آزادی کیلئے فیصلہ کن کردار ادا کرے ، کشمیریوں نے اپنے حصے کا کام کرلیا ہے اب آزادی کی اس تحریک کو منزل سے ہمکنار کرنے کیلئے مظفرآباد اور اسلام آباد نے فیصلہ کن کردار ادا کرنا ہے، کشمیر لبریشن سیل کے زیر اہتمام یوم الحاق پاکستان کے موقع پر تقریب سے خطاب کرتے ہوئے ڈاکٹر محمد مشتاق خا ن نے کہا کہ مودی کے یک طرفہ اقدامات سے مسئلہ کشمیرکی قانونی اور عالمی حیثیت متاثر نہیں ہوتی، کشمیریوں کو یہ حق حاصل ہے کہ وہ ہندوستان کے جبری فوجی قبضے کیخلاف مزاحمت کریں، کشمیریوں کا حق مزاحمت بحال کیا جائے۔ کشمیری اقوام متحدہ کے چارٹر اور اسلامتی کونسل کی قرارادادوں کے مطابق اپنے حق کے حصول کیلئے جائز جدوجہد کر رہے ہیں، انھوں نے کہا کہ کشمیرلبریشن سیل اپنے انداز سے کاوشیں کررہا ہے اس کی مزید منظم کرنے کی ضرورت ہے۔ عالمی سطح پر اس مسئلے کو آٹھانے کو اجاگر کرنے کی ضرورت ہے،اس موقع پر دیگر قائدین نے بھی خطاب کیا۔