وزیراعظم نےجنریشن ان لمیٹڈ سٹریٹجک ایڈوائزری کونسل کے قیام کی منظوری دیدی

اسلام آباد (اے پی پی)چیئرمین پرائم منسٹر یوتھ پروگرام رانا مشہود خان نے کہا ہے کہ وزیراعظم نے وزیراعظم آفس اسلام آباد میں جنریشن ان لمیٹڈ سٹریٹجک ایڈوائزری کونسل (جی ای این یو)کے قیام کی منظوری دے دی ہے، یہ اہم قدم نوجوانوں کو بااختیار بنانے ،سٹریٹجک شراکت داری اور جدید فنانسنگ کے ذریعے پائیدار ترقی کےلئے حکومت کے عزم کو واضح کرتا ہے، کونسل مختلف شعبوں کے اعلیٰ عہدیداروں اور نمائندوں پر مشتمل ہے، وزیر اعظم کونسل کے سرپرست اعلیٰ اور وزیراعظم یوتھ پروگرام کے چیئرمین ایڈوائزری کونسل کے چیئرمین اور کنوینئر کے طور پر کام کریں گے۔ جمعہ کو وزیراعظم یوتھ پروگرام سے جاری بیان کے مطابق ایڈوائزری کونسل کے دیگر ارکان میں اقتصادی امور ڈویژن کے وزیر، وفاقی تعلیم و پیشہ ورانہ تربیت کے وزیر، منصوبہ بندی، ترقی اور خصوصی اقدامات کے وزیر، بیرون ملک مقیم پاکستانیوں اور انسانی وسائل کی ترقی کے وزیر، انفارمیشن ٹیکنالوجی اور ٹیلی کمیونیکیشن کے وزیر، وفاقی وزیر برائے منصوبہ بندی، ترقی اور خصوصی اقدامات ،تجارت، وزیر برائے صنعت و پیداوار، وزیر برائے قومی ورثہ و ثقافت، وزیر بین الصوبائی رابطہ، اور وزیر برائے موسمیاتی تبدیلی شامل ہیں۔ مزید برآں یونیسیف جنریشن ان لمیٹڈ کے کنٹری نمائندے، اقوام متحدہ کے ریزیڈنٹ کوآرڈینیٹر، صوبائی وزراء برائے امور نوجوانان بشمول آزاد جموں و کشمیر اور گلگت بلتستان، نیشنل یوتھ کونسل مرد و خواتین کے نمائندے، فیڈریشن آف پاکستان چیمبرز آف کامرس اینڈ انڈسٹری کے صدر، صدر اوورسیز انویسٹرز چیمبر آف کامرس اینڈ انڈسٹری اور ہاشو گروپ کے صدرالدین ہاشوانی بھی کونسل کے کلیدی ارکان میں شامل ہیں۔