فلسطینی ریاست کیخلاف اسرائیلی پارلیمنٹ کی قراردادقابل مذمت ہے،یورپی یونین

برسلز ( حافظ اُنیب راشد ) یورپین یونین نے اسرائیلی پارلیمنٹ کی جانب سے فلسطینی ریاست کے قیام کے خلاف منظور کی گئی قررداد کی مذمت کرتے ہوئے یاد دلایا کہ تنازع کا دو ریاستی حل ہی امن کا ضامن ہے،فلسطینی عوام کی ناامیدی تنازع کو مزید گہراکردے گی ۔ یورپین خارجہ امور کے سربراہ جوزپ بوریل نے کہا کہ ʼیورپی یونین فلسطینی ریاست کے قیام کی مخالفت میں 18 جولائی کو کنیسٹ(اسرائیلی پارلیمنٹ) کی منظور کی گئی قرارداد کی مذمت کرتی ہے، چاہے وہ اسرائیل کے ساتھ مذاکراتی تصفیہ کا حصہ ہی کیوں نہ ہو ۔ انہوں نے کہا کہ عالمی برادری میں ایک مضبوط اتفاق رائے ہے کہ مشرق وسطیٰ میں امن اور سلامتی کا واحد پائیدار حل دو ریاستی حل ہے،فلسطینیوں اور اسرائیلیوں کو تحفظ، وقار اور امن کے ساتھ رہنے کا مساوی حق حاصل ہے۔ اپنی دیرینہ مشترکہ پوزیشن اور اقوام متحدہ کی سلامتی کونسل کی قراردادوں کے مطابق یورپ 1967 کی سرحدوں میں تبدیلیوں کو تسلیم نہیں کرے گا جب تک کہ فریقین متفق نہ ہوں۔ انہوں نےکہاکہ ہم اس مقصد کے حصول تک سیاسی عمل کو بحال کرنے کے لیے بین الاقوامی اور علاقائی شراکت داروں کے ساتھ فعال طور پر کام کرتے رہیں گے۔ انہوں نے مزید کہاکہ فلسطینی ریاست کا ایک قابل اعتبار راستہ اس سیاسی عمل کا ایک اہم جزو ہے۔ انہوں نے واضح کیا کہ فلسطینی عوام کے لیے کوئی امید اور کسی افق کا نہ ہونا، اس تنازع کو مزید گہرا کرد ے گا۔