سری لنکا میں قید پاکستانیوں کو ایک ہفتے میں وطن واپس لانے کا فیصلہ

اسلام آباد (اے پی پی)وفاقی وزیرداخلہ محسن نقوی سے سری لنکن ہائی کمشنرکی ملاقات کے دوران فیصلہ کیا گیا کہ سری لنکا میں قید پاکستانیوں کو 7روز میں وطن لایاجائے گا۔ وفاقی وزیر داخلہ و انسداد منشیات محسن نقوی سے سری لنکا کے ہائی کمشنر ایڈمرل (ر) رویندرا چندرا سری وجے گونارتنے نے ملاقات کی جس میں باہمی دلچسپی کے امور اور سری لنکا میں کئی برس سے قید پاکستانی شہریوں کی رہائی کے حوالے سے تبادلہ خیال کیا گیا۔ ملاقات میں گزشتہ کئی سال سے سری لنکا میں قید پاکستانیوں کو 7 روز میں وطن واپس لانے کا فیصلہ کیا گیا۔سری لنکا میں پاکستانی قیدیوں کی وطن واپسی کیلئے دونوں جانب سے ضروری کارروائی جلد مکمل کرنے پر اتفاق کیا گیا۔ سری لنکن ہائی کمشنر نے پاکستانی قیدیوں کی رہائی کے لیے اپنے ہر ممکن تعاون کی یقین دہانی کرائی۔ وزیرداخلہ محسن نقوی نے قیدیوں کی وطن واپسی کیلئے تعاون پر سری لنکن ہائی کمشنر کاشکریہ ادا کیا اور کہا کہ سری لنکا میں قید پاکستانی شہریوں کی وطن واپسی کیلئے تمام اقدامات کو جلد از جلد حتمی شکل دی جا رہی ہے۔ ملاقات میں انسداد منشیات اور بارڈر سکیورٹی کے امور پر بھی گفتگو کی گئی۔ وزیر داخلہ نے کہا کہ سری لنکا اور پاکستان کے درمیان تعلقات وقت کے ساتھ مضبوط ہوئے ہیں باہمی تعلقات کو مزید آگے بڑھانے کیلئے تیزی سے اقدامات کرنے کی ضرورت ہے۔انہوں نے کہا کہ انسداد منشیات اور بارڈرسیکورٹی کے حوالے سے باہمی تعاون کو فروغ دینا وقت کا تقاضا ہے۔سری لنکن ہائی کمشنر نے کہا کہ سری لنکا پاکستان کے ساتھ اپنے تعلقات کوبہت اہمیت دیتا ہے۔