کاہنہ ہسپتال میں ڈلیوری کی ناکافی سہولتیں،خواتین کیلئے پریشانی

لاہور(جنرل رپورٹر)گورنمنٹ کاہنہ ہسپتال میں ڈلیوری کی ناکافی سہولتیں ہیں ، خصوصاً رات کے وقت خواتین کو ڈلیوری کے لیے دوسرے ہسپتالوں میں شفٹ کیا جارہا ہے۔28سالہ حنا نثار نو ماہ سے کاہنہ ہسپتال کے آؤٹ ڈور میں آتی رہی اور ایک دن داخل رہنے کے بعد اسے رات دو بجے دوسرے ہسپتال یہ کہہ کر ریفر کردیا گیا کہ ہمارے پاس سی سیکشن آپریشن کی رات میں سہولت میسر نہیں ہے۔ حنا نثار گنگارام ہسپتال پہنچی تو تمام رپورٹس نارمل تھیں جنہوں نے اسے دوبارہ کاہنہ ہسپتال ریفر کیا جہاں اس کا سی سیکشن کیا گیا۔ سی ای او، پی ایچ ایف ایم سی ڈاکٹر عاصم الطاف کا کہنا ہے کہ ڈاکٹرز کے اس اقدام کا نوٹس لیا جائے گا ہمارے پاس تمام سہولیات میسر ہیں جبکہ دوسری جانب ایم ایس ڈاکٹر فیض الحسن نے کہا ہے کہ رات کو ہمارے ہسپتال میں بے ہوشی کا ڈاکٹر موجود نہیں ہوتا جس کی وجہ سے آپریشن نہیں کرسکتے ۔