کراچی پورٹ ٹرسٹ ہیڈ کوارٹرز کے سامنے دھرنا‘ قائمہ کمیٹی قومی اسمبلی بدھ کو سماعت کریگی

اسلام آباد (رپورٹ:حنیف خالد) کراچی پورٹ ٹرسٹ ہیڈ کوارٹرز کے سامنے دھرنے کا قومی اسمبلی کی قائمہ کمیٹی برائے بحری امور نے نوٹس لے لیا ہے اور کے ڈی ایل بی (کراچی ڈاک لیبر بورڈ)کے نمائندوں کو 23جولائی 2024ء کو مدعو کر لیا ہے۔ سیکرٹری وزارت بحری امور نے وزارت کے تنظیمی ڈھانچے اور انتظامی معاملات پر بات چیت کرتے ہوئے کہا کہ موجودہ مالی سال میں 80ارب روپے کا منافع ہوا اور اگلے سال کیلئے یہ ہدف اسی ارب سے سو ارب روپے تک ہے۔ چیئرمین پورٹ قاسم اتھارٹی‘ ڈائریکٹر گوادر پورٹ اور ایگزیکٹو ڈائریکٹر پاکستان نیشنل شپنگ کارپوریشن نے کمیٹی کو پارٹی اجلاس میں کام کے بارے میں بریفنگ دی۔ چیئرمین کراچی پورٹ ٹرسٹ نے بتایا کہ پورٹ بورڈ آف ٹرسٹیز کیلئے کام کر رہی ہے جس کے گیارہ ممبر ہیں جن کی سربراہی چیئرمین کے پی ٹی کرتے ہیں۔ کمیٹی نے کراچی ڈاک لیبر بورڈ کے نمائندوں کو 23جولائی کو کراچی پورٹ ٹرسٹ ہیڈ کوارٹرز کے سامنے دھرنے سے متعلق مسائل کو مکمل تفصیلات کے ساتھ لانے کی ہدایت کی۔ کمیٹی کے سیکرٹری وزارت بحری امور کے سیکشن آفیسر سید وسیم کاظمی نے بتایا کہ کمیٹی کو سیکرٹری وزارت بحری امور کی طرف سے وزارت اور اس سے منسلک محکموں کے تنظیمی ڈھانچے اور کام کے بارے میں بریفنگ دی گئی۔ یہ تعارفی اجلاس کمیٹی کے چیئرمین رکن قومی اسمبلی عبدالقادر پٹیل کی سربراہی میں ہوا۔ اجلاس میں جن کمیٹی کے ممبران اراکین اسمبلی ملک شاکر بشیر اعوان‘ ملک سیف الملک کھوکھر‘ مسٹر گیسو مل کھیل داس‘ سید رفیع اللہ‘ سردار نوید احمد گبول‘ حسان صابر‘ شاہ احمد علی شاہ‘ شاہد احمد‘ خرم منور منج‘ وزارت بحری امور اور اس سے منسلکہ محکموں کے سینئر عہدیداروں نے شرکت کی اور قائمہ کمیٹی برائے بحری امور کے فاضل ارکان کے ہر قسم کے تلخ و شیریں سوالات کے جوابات دیئے۔