مخصوص نشستوں کا معاملہ اسپیکر کے پاس آئیگا تووہ فیصلہ کرینگے،رانا ثناء

کراچی (ٹی وی رپورٹ) جیوکے پروگرام ”نیا پاکستان شہزاد اقبال کے ساتھ“ میں گفتگو کرتے ہوئے وزیراعظم کے مشیر برائے سیاسی امور رانا ثناء اللہ نے کہا ہے کہ مخصوص نشستوں کا معاملہ جب اسپیکر کے پاس آئے گا تو وہ فیصلہ کریں گے،ن لیگ کبھی دو کشتیوں میں سوار نہیں ہوتی، ن لیگ کا ہر معاملہ پر بہت واضح موقف ہوتا ہے، پی ٹی آئی پر پابندی کیلئے ہمارے پاس ٹھوس شواہد ہیں،رکن جوڈیشل کمیشن آف پاکستان اختر حسین نے کہا کہ جسٹس طارق مسعود کی بطور ایڈہاک جج تقرری 8-1کی اکثریت سے ہوئی ہے، جسٹس مظہر عالم میاں خیل کے نام پر بھی تمام آٹھ ججز متفق تھے ، رانا ثناء اللہ نے کہا قانونی ٹیم سے مشاورت کریں گے کہ کیا نظرثانی اپیل کیلئے تفصیلی فیصلے کا انتظار کیا جانا چاہئے ، کوئی ادارہ آئین کے برخلاف بات کرتا ہے تو ہم آئین کے ساتھ کھڑے ہوں گے، چیف جسٹس آف پاکستان کے متعلق جو گفتگو ہورہی ہے کیا ان کی کوئی عزت نہیں ہے، مریم نواز نے ججوں کو محترم اور معزز کہہ کر عزت کے ساتھ بات کی ہے۔