پاکستان کی عمان کو دہشتگردی سے نمٹنے کیلئے تعاون کی پیشکش

سلام آباد (نیوز رپورٹر) وزیر اعظم شہباز شریف سے سلطنت عمان کے سفیر فہد سلیمان خلف الخروسی نے جمعہ کو ملاقات کی۔وزیراعظم نے مسقط کے ضلع وادی کبیر میں امام بارگاہ علی بن ابو طالب پر ہونے والے بزدلانہ دہشتگرد حملے کی شدید مذمت کی جس کے نتیجے میں چار پاکستانی شہریوں سمیت6 افراد جاں بحق اور 30 سے زائد زخمی ہوئے، جن میں سے تقریباً سبھی پاکستانی تھے۔ وزیراعظم نے حملے میں شہید ہونے والے پاکستانیوں کی میتوں کی وطن واپسی اور زخمیوں کے علاج کیلئے عمان کی جانب سے فوری اقدامات اور پاکستانی سفارتخانے کے ساتھ تعاون کو سراہا۔ وزیرِ اعظم نے عمان کو دہشتگردی کی عفریت سے نمٹنے کیلئے پاکستان کے تعاون کی پیشکش کی۔ملاقات کے دوران وزیر اعظم نے سلطان ہیثم بن طارق کیلئے اپنی نیک خواہشات کا اظہار کیا اور ان کو جلد از جلد پاکستان کا سرکاری دورہ کرنے کی اپنی گزشتہ دی گئی دعوت کا اعادہ کیا۔ وزیراعظم نے پاکستان کی طرف سے دونوں ممالک کے درمیان مختلف شعبوں بالخصوص تجارت، سرمایہ کاری، توانائی اور دفاع میں دو طرفہ تعاون کو مزید مضبوط کرنے کی خواہش کا اظہار کیا، انہوں نے تجارت اور سرمایہ کاری میں تعاون کیلئے وفد کو آئندہ ہفتے پاکستان کا دورہ کرنے کی ترغیب دینے پر سفیر کا شکریہ ادا کیا اور انہیں یقین دلایا کہ متعلقہ حکام باہمی طور پر مفید نتائج کے حصول کے لیے وفد کو مکمل تعاون فراہم کرینگے۔ عمان کے سفیر نے وزیر اعظم کا شکریہ ادا کیا اور عمان کے سلطان کی طرف نیک خواہشات کا اظہار کیا۔ انہوں نے اپنے ملک کے پاکستان کے ساتھ تجارتی اور سرمایہ کاری کے تعلقات کو مزید بڑھانے کی خواہش کا اعادہ کیا۔