اسکاٹ لینڈ میں بھی یوم عاشور عقیدت و احترام سے منایا گیا

گلاسگو (طاہر انعام شیخ) نواسہ رسولﷺ حضرت امام حسین ؓاور ان کے جانثاروں کی عظیم قربانیوں کی یاد میں اسکاٹ لینڈ میں بھی یوم عاشور عقیدت و احترام سے منایا گیا۔ گلاسگو میں ڈھائی بجے دوپہر محرم الحرام کا مرکزی جلوس امام بارگاہ اثنا عشری ایشلے سٹریٹ سے برآمد ہوا جس میں الیدے سنٹر، اہل بیت سنٹر، المادی اور ایڈنبرا کے جلوس آکر مل گئے۔ جلوس میں مردو زن اور بچے بھی شامل تھے۔ خواتین جلوس کےعقب میں ساتھ چل رہی تھیں۔ عزاداران حسینؓ یا حسینؓ، لبیک یا حسینؓ کے نعرے لگاتے ہوئے ماتم زنی کرتے رہے۔ جلوس گریٹ ویسٹرن روڈ کا چکر لگا کر واپس ایشلے سٹریٹ آیا جہاں علمائے کرام نے شہادت امام حسینؓ اور ان کے رفقا پر روشنی ڈالی اور کہا کہ حضرت امام حسینؓ نے اپنے خانوادے ، ساتھیوں اور خود اپنی جان کی قربانی دے کر یہ سبق دیاکہ جان تو قربان کی جاسکتی ہے لیکن کسی ظالم اور فاسق کی بیت نہیں کی جاسکتی اور اس قربانی کے ساتھ انہوں نے تاقیامت اسلام کو زندہ جاوید کردیا۔ سید ناصر جعفری اور مرزا لیاقت حسین نے کہا کہ اس وقت غزہ کے مظلوم عوام کے ساتھ جو ظلم و ستم کیا جا رہا ہے پوری امت مسلمہ کو یکجا ہوکر اس کے خلاف اکھٹے جدوجہد کرنے کی ضرورت ہے۔