سبی میں بجلی کی بندش سے عوام سراپا احتجاج ہیں‘ پشتونخوامیپ

کوئٹہ ( پ ر) پشتونخوا ملی عوامی پارٹی کے سیکرٹری جنرل عبد الرحیم زیارتوال نے کیسکو چیف شفقت علی سے ملاقات کی ۔ اس موقع پر او ڈی واپڈا شوکت جوگیزئی ، پارٹی ضلع سبی کے سیکرٹری ڈاکٹر نور احمد شاہ خجک،اللہ ڈنہ خجک ، ایڈووکیٹ آفتاب مرغزانی اور دوران ترین بھی موجود تھے ۔ انہوں نے صوبے میں بجلی کی غیر اعلانیہ لوڈشیڈنگ، عوام اور زمینداروں کو درپیش مشکلات ، بالخصوص شدید گرمی میں سبی و ہرنائی کے دیہاتوں میں بجلی کی بندش اور واپڈا کی مجرمانہ غفلت کی نشاندہی اور اس پر تفصیلی بات چیت کرتے ہوئے کیسکو حکام پر زور دیا کہ وہ غیر اعلانیہ لوڈشیڈنگ کا خاتمہ کرتے ہوئے بجلی کی بندش کے باعث شدید گرمی میں عوام کو درپیش مسائل ومشکلات کا ازالہ کریں کیونکہ سبی ایشیا کا گرم ترین علاقہ ہے اور یہاں بجلی کی بندش سے عوام سراپا احتجاج ہیں ۔ دن رات بجلی نہیں اور پانی کی شدید قلت پیدا ہوچکی ہے ۔ کیسکو حکام کی جانب سے شکایات کو نہ صرف سناگیا بلکہ انہیں ہنگامی بنیادوں پر حل کرنے کی یقین دہانی بھی کرائی گئی ۔