تربت: فائرنگ سے ایک شخص جاں بحق، ایک ٹرالر کو آگ لگا دی گئی

کوئٹہ+ تربت ( اسٹاف رپورٹر+ نامہ نگار) تربت میں نامعلوم افراد کی فائرنگ سے ایک شخص جاں بحق ایک راہگیر زخمی ہو گیا، پولیس کے مطابق تربت کا رہائشی شاہ گل ولد گل محمد گزشتہ روز گوادر اسٹاپ کےقریب بریانی کے ٹھیلے پر کھڑا تھا کہ نامعلوم موٹرسائیکل سوار اس پر فائرنگ کرتے ہوئے فرار ہو گئے، فائرنگ کے نتیجے میں وہ موقع پر ہی جاں بحق جبکہ ایک راہگیر زخمی ہوگیا۔ پولیس نے لاش اور زخمی کو ہسپتال پہنچایا جہاں ضروری کارروائی کے بعد لاش آبائی علاقے لاڑکانہ روانہ کر دی گئی جبکہ پولیس نے مقدمہ درج کر کے ملزمان کی تلاش شروع کر دی ۔ تربت لیویز کے مطابق نامعلوم افراد نے ایران سے آنے والے ٹائلز کے ٹرالر کو آگ لگا دی جس کے نتیجے میں ٹرالر کا آگے والا حصہ جل گیا ، تاہم کوئی جانی نقصان نہیں ہوا ، تربت کے علاقے شہرک میں سی پیک پر ٹائل لے جانے والی ٹریلروں پر مسلح افراد نے حملہ کردیا اور دو ٹرالروں میں سے ایک کو نذر آتش کرکے تباہ دوسرے ٹرالر کے ٹائروں کو فائرنگ کرکے پھاڑ دیا گیا ۔ ٹریلر کو آگ لگنےکے بعد سی پیک روڈ کا راستہ بند ہوگیا ۔ حملے کی زمہ داری تاحال کسی تنظیم نے قبول نہیں کی ۔