بنوں واقعہ کی شفاف تحقیقات کرائی جائیں‘ جمعیت نظریاتی

کوئٹہ(پ ر)جمعیت علماء اسلام نظریاتی پاکستان کے امیر مولانا خلیل احمد،سینئرنائب امیر وصوبائی امیر مولانا عبدالقادر لونی، صوبائی امیر خیبر پختونخوا قاضی گل الرحمٰن نکیال، جنرل سیکرٹری خیبر پختونخوا نجیم خان ایڈووکیٹ مرکزی سیکرٹری اطلاعات حاجی عبدالستار چشتی اورمرکزی سیکرٹری مالیات حاجی حیات اللہ کاکڑ نے کہا ہے کہ بنوں واقعہ جان بوجھ کر حالات خراب کرنے کی سازش ہے،امن دو کا نعرہ جرم بن چکا ہے ۔انہوں نے کہا کہ حکمران خیبرپختونخوا اور بلوچستان کو میدان جنگ بنانا چاہتے ہیں۔ ماضی میں ہونیوالے آپریشنز سے ملک کو امن کی بجائے تباہی کے دہانے پر پہنچا دیا، طاقت کسی مسئلے کا حل نہیں ۔ملک کو مضبوط ومستحکم بناناہے تو مذاکرات کے عمل کو آگے بڑھانا ہوگا۔ انہوں نے کہا کہ بنوں واقعہ کی شفاف تحقیقات کے لئے عدالتی ٹریبونل تشکیل دیا جائے ۔