جتنا مرضی ظلم کرو‘ ظالم کے سامنے سر نہیں جھکائوں گا‘،ملک ریاض

اسلام آباد (رپورٹ:حنیف خالد) چیئرمین بحریہ ٹائون ملک ریاض حسین نے ہفتہ 20جولائی کی شام ایک بیان میں کہا ہے کہ ’’جتنا مرضی ظلم کرو‘ میں ظالم کے سامنے سر نہیں جھکائوں گا‘ یہ سکیورٹی اہلکاروں کے بغیر کسی قانونی جواز کے بحریہ ٹائون کی عمارت میں گھسنے کے آج کے مناظر ہیں۔ ملک کی تعمیر میں کردار ادا کرنے کی بجائے گرانے میں دلچسپی کس ترجیح کی عکاسی کرتی ہے؟ حکومت جبر پر مبنی ایسی غیر قانونی اور غیر اخلاقی کارروائی صرف یہ پیغام دیتی ہے کہ اب کوئی بھی سرمایہ کار پاکستان میں محفوظ کاروبار نہیں کریگا۔ یہ کارروائیاں پاکستان کی معیشت کیلئے زہر قاتل ثابت ہونگی۔ ان سب ظلم و ستم کے باوجود میں اپنے موقف پر قائم ہوں ’’بنے ہیں اہل ہوس مدعی بھی منصف بھی‘ کسے وکیل کریں کس سے منصفی چاہیں‘‘۔ چیئرمین بحریہ ٹائون کی میڈیا ترجمان ندا ظہور سے جب اس بارے ٹیلیفون پر تصدیق چاہی تو انہوں نے جنگ کو بتایا کہ یہ بیان 20جولائی کی شام جاری کیا گیا ہے۔