اسرائیل فلسطینی قیدیوں کیساتھ غیر انسانی سلوک کر رہا ہے، مولانا واسع

کوئٹہ (آن لائن) جمعیت علما اسلام بلوچستان کے امیر مولانا عبدالواسع نے بیان میں فلسطینیوں پر جاری ظلم پر اظہار افسوس کرتے ہوئے کہاہے کہ اسرائیلی عقوبت خانوں میں فلسطینی قیدیوں کو پنجروں میں بند کرکے ظلم اور بربریت کی انتہا کی جارہی ہے سدی تیمان کیمپ میں مسلمان قیدیوں کے ساتھ غیر انسانی سلوک روا رکھا جا رہا ہے ۔ انہوں نے کہاہے کہ ظالم اور جابر اسرائیل تمام جنگی اصول کو پست پشت ڈال کر بہت ہی ڈھٹائی کے ساتھ غیر انسانی اقدام کر رہا ہے عالمی اداروں کو ان عقوبت خانوں میں نہیں چھوڑا جا رہا ہے اور نہ ہی ریڈ کراس کو قیدیوں کی مسائل کیلئے رسائی دی جاتی ہے۔ انہوں نے مزید کہاہے کہ ظلم اور بربریت اپنی انتہا کو پہنچ چکی ہے اس بابت اسرائیل نے تاریخ میں ایک تاریک باب رقم کیا ہے۔بچوں اور عورتوں پر جس طرح ظلم کیا جا رہا ہے عالمی دنیا کی مجرمانہ خاموشی قابل افسوس ہے۔ انھوں نے عالمی اداروں سے اسرائیلی عقوبت خانوں میں جاری ظلم پر مجرمانہ خوشی توڑنے اور اس طرف توجہ کی اپیل کی ہے۔