190ملین پائونڈ ریفرنس،عمران کے وکلا کی اعظم خان،زبیدہ جلال،پرویز خٹک پر جرح مکمل

اسلام آباد (این این آئی)190 ملین پونڈ ریفرنس میں پاکستان تحریک انصاف کے بانی چیئرمین سابق وزیر اعظم عمران خان کے وکلا نے استغاثہ کے گواہان وزیر اعظم کے سابق پرنسپل سیکرٹری اعظم خان، سابق وزرا زبیدہ جلال اور پرویز خٹک پر جرح مکمل کرلی،بشریٰ بی بی کے وکلا آئندہ سماعت پر جرح کریں گے،استغاثہ کے مزید2گواہان بیانات ریکارڈ کرانے کے لیے طلب کرلیے گئے۔ احتساب عدالت اسلام آباد کے جج محمد علی وڑائچ نے عمران خان اور ان کی اہلیہ بشریٰ بی بی کے خلاف 190 ملین پونڈز ریفرنس کی سماعت اڈیالہ جیل راولپنڈی میں کی۔سماعت کے دوران نیب کی جانب سے وکیل امجد پرویز اور ڈپٹی پراسیکیوٹر جنرل سردار مظفر عباسی لیگل ٹیم کے ہمراہ پیش ہوئے، ملزمان کی جانب سے چوہدری ظہیر عباس عدالت میں پیش ہوئے جب کہ بشریٰ بی بی کے وکیل عثمان ریاض گل عدالت میں پیش نہ ہوئے۔دوران سماعت عمران خان کے وکلا کی جانب سے سابق پرنسپل سیکرٹری اعظم خان، سابق وزیر زبیدہ جلال اور سابق وزیر دفاع پرویز خٹک کے بیانات پر جرح مکمل کر لی گئی۔سماعت کے دوران عمران خان کو انگریزی روزنامہ اخبار فراہم کرنے کی درخواست بھی دائر کی گئی۔عدالت نے آئندہ سماعت پر استغاثہ کے مزید 2 گواہان کو بیانات ریکارڈ کرانے کے لیے طلب کرتے ہوئے ریفرنس کی سماعت 22 جولائی تک ملتوی کردی۔آئندہ سماعت پر بشریٰ بی بی کے وکلا گواہان اعظم خان، زبیدہ جلال اور پرویز خٹک پر جرح بھی مکمل کریں گے۔