خیبرپختونخوا حکومت کا بنوں واقعہ کی شفاف تحقیقات کیلئے کمیشن بنانے کا اعلان

پشاور(صباح نیوز) خیبرپختونخوا حکومت نے بنوں واقعہ کی شفاف تحقیقات کیلئے کمیشن بنانے کا اعلان کر دیا۔مشیر اطلاعات خیبر پختونخوا بیرسٹر سیف نے اپنے ایک بیان میں کہا کہ وزیر اعلیٰ خیبرپختونخوا علی امین گنڈا پور نے بنوں میں جاری صورتحال کا نوٹس لیا، وزیراعلی نے بنوں واقعہ کی شفاف تحقیقات کیلئے کمیشن بنانے کا بھی اعلان کیا ہے۔انہوں نے کہا ہے کہ کمیشن شفاف اور غیرجانبدار تحقیقات کرکے رپورٹ پیش کریگا، کمیشن کی رپورٹ میں ذمہ داروں کی نشاندہی ہوجائیگی، رپورٹ کو پبلک کیا جائیگا اور ذمہ داروں کیخلاف قانونی کارروائی کی جائیگی۔بیرسٹر سیف کا کہنا تھا کہ حساس مقامات پر عموماً سیکورٹی ہائی الرٹ رہتی ہے، خودکش حملے میں فوجی جوان اور شہری شہید ہوئے تھے، اس مقام کی حساس نوعیت بھی ناخوشگوار واقعہ کی ایک وجہ بنی، موجودہ دہشت گردی کی لہر کے پیش نظر عوام سے انتہائی احتیاط سے کام لینے کی درخواست ہے۔مشیر اطلاعات خیبر پختونخوا نے اپنے بیان میں مزید کہا ہے کہ پاکستان اور عوام دشمن عناصر حالات خراب کرنے کی تاک میں بیٹھے ہیں، ملک دشمن عناصر کو امن خراب کرنے کا موقع نہیں دینا چاہئے۔