بارش ہوتے ہی کے الیکٹرک کے 300 فیڈر ٹرپ، کئی علاقوں میں بجلی بند

کراچی (اسٹاف رپورٹر)کراچی میں بارش کے بعد کے الیکٹرک کا نظام بری طرح بیٹھ گیا، سیکڑوں فیڈرز، پی ایم ٹیز اور سب اسٹیشنز بند ہونے سے متعدد علاقوں میں بجلی کی فراہمی بند ہوگئی۔تاہم کے الیکٹرک نے دعویٰ کیا کہ بارش کے دوران کے الیکٹرک کا نظام مستحکم رہا اور شہر میں 2,100 فیڈرز میں سے 2,000 فیڈرز سے بجلی کی فراہمی جاری رہی۔ ذرائع کے مطابق بارش کے بعد شہر کے مختلف علاقوں میں300 فیڈرز ٹرپ کرگئے،فیڈرز اور پی ایم ٹیز ٹرپ کرنے کے ساتھ ساتھ لوکل فالٹس کے باعث کورنگی، میٹروول III-، گلشن اقبال، اورنگی ٹائون، قصبہ کالونی، ڈی ایچ اے، گڈاپ سٹی، بن قاسم، گلشن حدید، بلدیہ ٹائون، اتحادٹاؤن، گلستان جوہر ، منگھوپیر، سائٹ، ہارون آباد،میوہ شاہ قبرستان، نارتھ ناظم آباد، ناظم آباد، لیاقت آباد، شادمان ٹائون اور دیگر علاقوں میں بجلی کی فراہمی معطل ہوگئی، جس سے شہریوں کو گرم و مرطوب موسم میں سخت مشکلات کا سامنا کرنا پڑا۔ اس ضمن میں کے الیکٹرک کے ترجمان نے کہا کہ بارش کےدوران چند فیڈرز پر بجلی کی فراہمی احتیاطی تدابیر کے تحت عارضی طور پر بند کی گئی۔