190ملین پاونڈز ریفرنس، عمران کے وکلاء کی اعظم خان، زبیدہ جلال ، پر ویز خٹک پر جرح مکمل

راولپنڈی(ایجنسیاں)اسلام آباد کی خصوصی احتساب عدالت میں بانی پی ٹی آئی اور ان کی اہلیہ بشری بی بی کے خلاف اڈیالہ جیل میں 190 ملین پاؤنڈ کرپشن ریفرنس کی سماعت ہوئی ،سابق وزیراعظم کے پرنسپل سیکرٹری اعظم خان،سابق وفاقی وزیر زبیدہ جلال اور پرویز خٹک کے بیانات پر جرح مکمل کرلی گئی ،دوگواہان پر جرح آئندہ ہو گی ، دوران سماعت عدالت میں بانی پی ٹی آئی کی جانب سے انگریزی اخبار فراہم کرانے کے لیے درخواست کی گئی ،عدالت نے آئندہ سماعت پر استغاثہ کے مزید دو گواہان کے بیانات ریکارڈ کرانے کے لیے طلب کرتے ہوے سماعت 22جولائی تک ملتوی کردی۔ گزشتہ روز اسلام آباد کی خصوصی احتساب عدالت کے جج محمد علی وڑائچ نے تحریک انصاف کے سابق چیئرمین اور ان کی اہلیہ بشری بیگم کے خلاف 190ملین پاؤنڈ کے مالیاتی سکینڈل پر مبنی القادر ٹرسٹ کرپشن ریفرنس کیس کی سماعت اڈیالہ جیل میں کی۔بانی پی ٹی آئی اور ان کی اہلیہ بشری بی بی کو جیل سے عدالت میں پیش کیا گیا۔سماعت کے دوران نیب کی جانب سے امجد پرویز سردار مظفر عباسی لیگل ٹیم کمرہ عدالت میں موجودتھی،جبکہ ملزمان کی جانب سے چوہدری ظہیر عباس ایڈووکیٹ عدالت میں پیش ہوئے۔بشری بی بی کے وکیل عثمان ریاض گل عدالت میں پیش نہ ہو سکے۔اڈیالہ جیل میں 190ملین پا ؤ نڈ کرپشن ریفرنس کی سماعت کے دوران سابق وزیراعظم کے پرنسپل سیکرٹری اعظم خان پر ملزمان کے وکلا کی جانب سے جرح کی گئی۔ جبکہ سابق وفاقی وزیر زبیدہ جلال اور پرویز خٹک کے بیانات پر بانی چیئرمین کے وکلا کی جانب سے جرح مکمل کی گئی۔سابق وفاقی وزیر زبیدہ جلال اور پرویز خٹک پر بشری بی بی کے وکلا آئندہ سماعت پر جرح مکمل کریں گے ۔احتساب عدالت کے جج محمد علی وڑائچ نے آئندہ سماعت پر استغاثہ کے مزید دو گواہان کے بیانات ریکارڈ کرانے کے لیے طلب کرتے ہو کرپشن ریفرنس کی سماعت 22جولائی تک ملتوی کر دی ہے۔