مسترد شدہ ڈرامے باز بنوں واقعہ پر سیاست کی ناکام کوشش کررہے ہیں، بیرسٹر سیف

پشاور ( آن لائن ) وزیر اعلیٰ خیبر پختونخوا کے مشیر اطلاعات و تعلقات عامہ بیرسٹر ڈاکٹر سیف نے کہا ہے کہ بعض مسترد شدہ سیاسی ڈرامے باز بنوں واقعہ پر سیاست کی ناکام کوشش کر رہے ہیں تاہم انتشار کی سیاست کرنے والوں کے منفی عزائم سے عوام بخوبی باخبر ہیں، وزیراعلیٰ خیبرپختونخوا علی امین گنڈا پور بنوں کی صورتحال کو مسلسل مانیٹر کر رہے ہیں، انتظامیہ کی عمائدین سے مذاکرات جاری ہیں، امن وامان کی صورتحال بہتر ہے ، خیبرپختونخوا مزید کسی بھی سانحے کا متحمل نہیں ہو سکتا،ان خیالات کا اظہار انہوں نے ایک بیان میں کیا۔ مشیر اطلاعات نے کہا کہ مقامی انتظامیہ اور سماجی عمائدین پر مشتمل کمیٹی کے مذاکرات جاری ہیں، مذاکرات کا عمل شروع ہوتے ہی بنوں میں امن بحال ہوا، سماجی عمائدین اور انتظامیہ پر مشتمل کمیٹی علاقے میں دیر پا قیام امن کو یقینی بنائے گی۔ بیرسٹر ڈاکٹرسیف نے کہا کہ وزیر اعلیٰ کی ہدایت پر قائم کمیشن بہت جلد واقعہ کے حوالے سے انکوائری رپورٹ جمع کرے گا۔مشیر اطلاعات بیرسٹر سیف نے کہا کہ خیبرپختونخوا دہشتگردی سے پہلے ہی کافی متاثر ہے اب اور کسی بھی بڑے سانحے کا متحمل نہیں ہو سکتا۔