نیا توشہ خانہ ریفرنس ، عمران اور بشریٰ نیب تفتیش میں شامل نہیں ہوئے

اسلام آباد،راولپنڈی (نمائندہ جنگ) عمران خان اور بشریٰ بی بی نے نئے توشہ خانہ کیس میں شامل تفتیش ہونے سے انکار کر دیا، نیب ٹیم اڈیالہ جیل کے تفتیشی کمرے میں ڈھائی گھنٹے موجود رہی۔ جبکہ توشہ خانہ سے متعلق نئے کیس میں 8 روزہ جسمانی ریمانڈ کے بعد عمران خان اوربشریٰ بی بی کو آج احتساب عدالت میں پیش کیا جائیگا۔ تفصیلات کے مطابق بانی پی ٹی آئی عمران خان اور انکی اہلیہ بشریٰ بی بی کو آج احتساب عدالت میں پیش کیا جائیگا۔ اس موقع پر نیب کی جانب سے دونوں ملزمان کا مزید ریمانڈ لینے کا امکان ہے۔ 14 جولائی کو احتساب عدالت نے دونوں ملزمان کا آٹھ روزہ جسمانی ریمانڈ منظور کرتے ہوئے انہیں 22 جولائی کو عدالت میں پیش کرنے کا حکم دیا تھا۔ ادھر معلوم ہوا ہے کہ گزشتہ روز عمران خان اور بشریٰ بی بی نے نئے توشہ خانہ کیس میں شامل تفتیش ہونے سے انکار کر دیا۔ نیب ٹیم اتوار کو ڈپٹی ڈائریکٹر نیب مستنصر امام شاہ کی سربراہی میں اڈیالہ جیل پہنچی، نیب ٹیم اڈیالہ جیل کے تفتیشی کمرے میں ڈھائی گھنٹے موجود رہی، اس دوران جیل انتظامیہ نے عمران خان اور بشریٰ بی بی کو متعدد پیغام بھجوائے لیکن دونوں تفتیشی ٹیم کے سامنے پیش نہیں ہوئے، وکلاء کی عدم موجودگی کے باعث ملزمان عمران خان اور بشریٰ بی بی کی جانب سے شامل تفتیش ہونے سے انکار پر نیب ٹیم واپس چلی گئی۔ تفتیش مکمل نہ ہونے پر نیب کی جانب سے آج احتساب عدالت سے ملزمان کا مزید ریمانڈ لئے جانے کا امکان ہے۔ تفتیش سے متعلق نیب کی پیشرفت رپورٹ آج عدالت پیش کی جائے گی۔ نئے توشہ خانہ ریفرنس میں دونوں ملزموں کے جسمانی ریمانڈ کا گزشتہ روز آخری دن تھا۔