اپنے آپکو سرکاری ادارے سے منسلک کرنیوالے مسلح عناصر جہاں ہوں،گرفتار کیا جائے،وزیر اعلیٰ گنڈاپور

پشاور (جنگ نیوز) وزیر اعلی ٰخیبر پختونخوا سردار علی امین خان گنڈاپور نے کہا ہے کہ اپنے آپکو سرکاری ادارے سے منسلک کرنیوالے مسلح عناصر جہاں ہوں،گرفتار کیا جائے،بنوں واقعہ بات چیت سےحل کرنے پر میں بنوں کے مشران، پارٹی ذمہ دران ودیگر کا مشکور ہوں، مشران پر مشتمل کمیٹی آج مجھ سے مل کر معاملے پر بات کریگی، فوج، پولیس اور عوام کی قربانیاں رائیگاں نہیں جائیں گی، سب کو ملکر دہشتگردی کا مقابلہ اور صوبے میں امن قائم کرنا ہے، قربانیاں دینے والوں کے خاندانوں کو سلام پیش کرتا ہوں، گزشتہ روز بنوں واقعے کے بعد انتظامیہ کے ساتھ مل بیٹھ کر بات چیت کے ذریعے معاملے کو حل کرنے پر میں بنوں کے مشران، اپنی پارٹی کے ذمہ دران اور دیگر تمام لوگوں کا مشکور ہوں، علاقے کے مشران نے معاملے پر ایک کمیٹی تشکیل دی ہے اور یہ کمیٹی آج مجھ سے مل کر معاملے پر بات کرے گی۔ بنوں واقعے کے حوالے سے اپنے ویڈیو بیان میں وزیر اعلیٰ نے کہا ہے کہ ہم عوامی لوگ ہیں، عوام کی طاقت سے اقتدار میں آئے ہیں، ہمیشہ عوام کا ساتھ دیا ہے، آئندہ بھی عوام کا ساتھ دیتے رہیں گے ہم اس معاملے پر عوام کے تحفظات کو دور کریں گے اور ان کی توقعات پر پورا اتریں گے اور بحیثیت حکومت یہ ہماری ذمہ داری اور عوام کا حق ہے۔