مغوی کی سر کٹی لاش برآمد، 2 تھانوں کی پولیس ملزم نہ پکڑ سکی وزیراعلیٰ نوٹس لیں ،والد

لاہور(کرائم رپورٹر سے) سیالکوٹ کے تھانہ قلعہ کالر والاکی حدود سے اغوا ہونیوالے مغوی سجاد عرف بگو کی سرکٹی بوری بند لاش لاہور کے تھانہ باٹا پورکی حدودمیں نہر کھیرا پل سے برآمد، شناخت ہونے کے باوجود 2تھانوں کی پولیس ملزمان کو گرفتار کرنے میں بری طرح ناکام ہوگئی۔مقتول سجاد عرف بگو کےوالد اور لواحقین نے وزیر اعلیٰ مریم نواز اور آئی جی پنجاب سےمطالبہ کیا ہے کہ بیٹے کے قتل کا نوٹس لیں اور ملزمان کو گرفتار کرکےفوری انصاف فراہم کیا جائے۔تھانہ قلعہ کالر والاسیالکوٹ کے موضع نیا مانگا کے رہائشی رشید احمد کے 50سالہ بیٹے سجاد عرف بگو کورواں سال 21فروری کوفیروزوالا کے رہائشی ملزمان احسان الٰہی اور صدام عرف ہیرا وغیرہ نے دیگر 2نامعلوم ملزمان کے ساتھ ملکر اغوا کیا،جس پرسجاد کے والد نےبیٹے کا مقدمہ ملزمان کے خلاف درج کروایا ،بعدازاں 30اپریل کو تھانہ باٹا پور کو کھیرا پل کی نہر سے ایک بوری بند سر کٹی لاش ملی،جس پر پولیس نے نامعلوم ملزمان کیخلاف ایف آئی آر درج کی اور مقتول کی شناخت کیلئے نادرا سے رجوع کیاتو مقتول کی شناخت ہوگئی۔ جس پر دو تھانوں کی حدود میں ایف آئی آر درج ہونے کے باوجود ملزمان پولیس کی گرفت سے دور ہیں ۔پولیس ترجمان کا کہنا ہے کہ ملزمان کی گرفتاری کیلئے کوششیں کر رہے ہیں،ملزمان جلد پولیس کی گرفت میں ہونگے۔