حکومت غیر منصفانہ آئی پی پیز معاہدوںکیخلاف عالمی عدالت جائے، زاہد توصیف

فیصل آباد (نمائندہ جنگ) سینئر سیاستدان اور سابق رکن قومی اسمبلی رانا زاہد توصیف نے آئی پی پیز کو بجلی بنائے بغیر کیپسٹی چارجز کی ادائیگی کے غیر منصفانہ معاہدوں کو ختم کرنے کے لئے عالمی عدالت انصاف سے رجوع کرنے کا مطالبہ کیا ہے۔ ’’جنگ‘‘ سے گفتگو کرتے انہوں نے کہا پاکستان میں آئی پی پیز سے ہونیوالے معاہدوں کا تقابل اسی عرصے کے دوران دیگر ممالک میں لگنے والے آئی پی پیز سے کرکے یہ بات باآسانی پتہ لگائی جا سکتی ہے کہ ان معاہدوں میں کتنی کرپشن ہوئی ہے۔ احتساب کیلئے منافع، کیپسٹی چارجز کی ڈالر میں ادائیگی کے حقائق سامنے لائے جائیں، صنعتی تنظیموں نے آئی پی پیز کو کپیسٹی چارجز کی ادائیگی کے خلاف احتجاج کا اعلان کرکے بالکل درست فیصلہ کیا، آج ملک میں صنعتیں بند ہو رہی ہیں اور لوگ بجلی کے بھاری بل ادا کرنے اور پٹرول ڈلوانے سے قاصر ہیں۔ اگر ملک کو صرف 20 ہزار میگاواٹ بجلی درکار تھی تو 47 ہزار میگاواٹ بجلی بنانے کے معاہدے کیوں کئے گئے۔