قومی جانچ کے فریم فورم کی تشکیل کی منظوری

کراچی( سید محمد عسکری ) انٹر بورڈز کوآرڈنیشن کمیشن( آئی بی سی سی) کا 179واں دو روزہ اجلاس اسکردو میں منگل ۲۳ جولائی کو ہوگا جس میں قومی جانچ کے فریم فورم کی تشکیل (FORMULATION OF NATIONAL ASSESSMENT FRAMEWOR) اور گریس مارکس کے بارے میں اہم فیصلے کیئے جائیں گے۔ آئی بی سی سی کے سیکریٹری غلام علی ملاح نے جنگ کو بتایا کہ اجلاس میں اگر قومی جانچ کے فریم فورم کی تشکیل کی منظوری ہوجاتی ہے تو پورے ملک میں طلبہ کیلئے ایک طرح کے امتحانی پرچے ہوں گے اور یہ چکر ختم ہوجائے گا کہ فلاں بورڈ کا پرچہ آسان ہوتا ہے فلاں بورڈ کا مشکل چناچہ اسی بنیاد پر کاپیاں بھی جانچی جائیں گی انھوں نے بتایا کہ گریس مارک کے بارے میں بھی پالیسی ترتیب دی جاتی ہے کیونکہ اس وقت کوئی بورڈ گریس مارک کے 11نمبر دیتا ہے تو کوئی 5 یا 3لہذا یہ طے کیا جائیگا کہ ہر بورڈ کتنے گریس مارکس دے سکتا ہے۔