ایم این ایز کو خریدنے کیلئے بڑی آفرز آرہی ہیں، اسد قیصر

صوابی ( نمائندہ جنگ) تحریک انصاف کے رہنماء اور سابق سپیکر قومی اسمبلی اسد قیصر نے پورے پاکستان میں آئندہ جمعہ سے تحریک تحفظ آئین پاکستان کے تحت احتجاج کا اعلان کرتے ہوئے کہا ہے کہ ہمارے ایم این ایز کو خریدنے کیلئے بڑی بڑی آفرز آرہی ہیں ۔لوگوں کو دبایا جا رہا ہے کہ اپنی وفاداری تبدیل کریں۔اس وقت ملک میں آگ اور خون کا کھیل کھیلا جا رہا ہے اور یہ ایک سیاسی جماعت کے خلاف کریک ڈائون کر رہے ہیں ۔ ہمارے احتجاج کے تین اغراض و مقاصد ہیں۔ ہمارا احتجاج ملک میں بگڑتی امن و امان کی صورت حال اور حکومت کی ناکامی کے خلاف ہے۔ دوسرا ہمارا احتجاج اس وقت ناجائز طور پر عمران خان ، بشریٰ بی بی اور ہمارے دیگر اسیران جیلوں میں ہیں اور ہمارے سوشل ورکر اور خاص طور پر سوشل میڈیا سے متعلقہ لوگوں کو ناجائز طور پر اٹھانے اور غائب کرنے کے خلاف ہے تیسرا ہمارا احتجاج مہنگائی کے خلاف ہے جو انہوں نے بجٹ کے ذریعے غریب عوام پر قیامت برپا کی ہے۔ بجلی کی بلوں میں اضافہ کیا گیا ہے، پیٹرول کی قیمتوں میں اضافہ کیا گیا ہے، بہت زیادہ ٹیکسز لگائے گئے ہیں جو ناقابل برداشت ہیں ۔ اپنے ویڈیو بیان میں انہوں نے کہا کہ تمام طبقے خواہ وہ کسان، طلباء ، تاجر ہو یا مزدور ہم سب نے اس ملک کو بچانا ہے۔ میرے پاکستانی بھائیوں آپ لوگوں نے نکلنا ہے جمعہ کو تاریحی احتجاج کریں گے۔تمام سیاسی جماعتوں بلخصوص جی ڈی اے کو احتجاج میں شرکت کی دعوت دیں گے۔