نیا توشہ خانہ ریفرنس ، عمران اور بشریٰ نیب تفتیش میں شامل نہیں ہوئے

اسلام آباد،راولپنڈی (نمائندہ جنگ) توشہ خانہ سے متعلق نئے کیس میں 8 روزہ جسمانی ریمانڈ کے بعد بانی پی ٹی آئی عمران خان اور انکی اہلیہ بشریٰ بی بی کو آج احتساب عدالت میں پیش کیا جائے گا۔ اس موقع پر نیب کی جانب سے دونوں ملزمان کا مزید ریمانڈ لینے کا امکان ہے۔ 14 جولائی کو احتساب عدالت نے دونوں ملزمان کا آٹھ روزہ جسمانی ریمانڈ منظور کرتے ہوئے انہیں 22 جولائی کو عدالت میں پیش کرنے کا حکم دیا تھا۔ ادھر معلوم ہوا ہے کہ گزشتہ روز عمران خان اور بشریٰ بی بی نے نئے توشہ خانہ کیس میں شامل تفتیش ہونے سے انکار کر دیا۔ نیب ٹیم اتوار کو ڈپٹی ڈائریکٹر نیب مستنصر امام شاہ کی سربراہی میں اڈیالہ جیل پہنچی ، نیب ٹیم اڈیالہ جیل کے تفتیشی کمرے میں اڑھائی گھنٹے موجود رہی، اس دوران جیل انتظامیہ نے عمران خان اور بشریٰ بی بی کو متعدد پیغام بھجوائے لیکن دونوں تفتیشی ٹیم کے سامنے پیش نہیں ہوئے۔