یونیورسٹی آف کوٹلی کے3اعلیٰ عہدیدار اختیارات کے ناجائز استعمال پر گرفتار

کوٹلی(نمائندہ جنگ ) آزاد جموں و کشمیر احتساب بیورو کی تفتیشی ٹیم نے یونیورسٹی آف کوٹلی کے3 اعلی عہداروں کو اختیارات کے ناجائز استعمال ، اقربا پروری اور جعلسازی پر گرفتار کرکے سیف ہائوس احتساب بیورو میرپور منتقل کر دیا ہے۔معلوم ہوا ہے کہ گزشتہ روز احتساب بیورو کی ٹیم نے کوٹلی یونیورسٹی کے اسسٹنٹ پروفیسر اکنامکس، رجسڑار یونیورسٹی آف کوٹلی اور اکائونٹنٹ کو گرفتار کر لیا ہے۔ اسسٹنٹ پروفیسر اکنامکس پر الزام ہے کہ انہوں نے خلاف میرٹ اور متعلقہ تعلیمی قابلیت کے مغائر اپنی تعیناتی بطور اسسٹنٹ پروفیسر کروائی ۔تقرری کے وقت ریکارڈ میں ردوبدل کرتےہوئے اور اختیارات کا ناجائز استعمال کرتے ہوئے ایک شخص کی بطور اسسٹنٹ پروفیسر اکنامکس B 19 خلاف قواعد تقرری عمل میں لائی گئی ۔ رجسٹرار وقت نے اپنی تقرری بطور پروفیسر اکنامکس یونیورسٹی آف کوٹلی کرواتے وقت بیرون ملک سے حاصل کردہ ڈگریوں کی بنیاد پر ملازمت حاصل کی جبکہ ہائیر ایجوکیشن کمیشن سے Equallence حاصل کرنا ضروری ہوتا ہے لیکن ملزم مذکور نے equallance حاصل نہیں کی۔ نیز ملزم نے تعیناتی کے وقت اپنا تجربہ بھی غلط ظاہر کیا ۔اسی طرح اکائونٹنٹ کی بھی تقرری خلاف قواعد عمل میں لائی گئی ۔ عامر خلیل کو ٹیسٹ انٹریو میں ناکام ہونے کے باوجود رجسٹرار وقت نے اسامی دوبارہ مشتہر کیے بغیر ہی اس کو اکائونٹنٹ تعینات کر دیا ۔ اس طرح ملزمان نے اختیارات کا نہ صرف ناجائز استعمال کیا بلکہ جعلسازی کے بھی مرتکب ہوئے ۔ملزمان سے مزید تفتیش جاری ہے۔ اس کیس میں ملوث دیگر ملزمان کے خلاف بھی سخت کارروائی عمل میں لائی جائے گی۔