ٹرکوں پر فائرنگ کے واقعات حکومتی ناکامی ہے‘ پشتونخوانیپ

کوئٹہ(پ ر) پشتونخوا نیشنل عوامی پارٹی کےصوبائی بیان میں ہرنائی کے علاقے طورخان تنگی میں چار ٹرکوں پر فائرنگ ،جلانے ،تین افراد کو زخمی اور موسیٰ خیل کے علاقے راڑہ ہاشم میں ایک ٹرک پر فائرنگ ،ڈرائیور نذیر احمد کو شہید اور ساتھی محمد نور کو زخمی کرنے کے واقعات کی مذمت کرتے ہوئے اسے صوبائی حکومت اور قانون نافذ کرنے والے اداروں کی ناکامی سے تعبیر کیا ہے۔ بیان میں کہا گیا کہ سبی تا ہرنائی، سنجاوی اور دکی میں دہشتگردی، بدامنی اور لاقانونیت پر مبنی واقعات مسلسل ہوتے رہے ہیں اور ان میں معصوم افراد کی شہادتوں کے ساتھ ہمیشہ ٹرکوں اور مائنز پر حملے ہونے اور ان کے جلانے کے واقعات شامل ہیں لیکن ان تمام درجنوں واقعات میں ملوث عوام دشمن ملزموں کی گرفتاری ممکن نہیں ہو سکی اور حکومت ملزمان کی گرفتاری میں ناکام ہے جو قابل افسوس اور قابل گرفت ہے۔ بیان میں کہا گیا کہ سبی،ہرنائی، شاہرگ، خوست، زردالو، دکی، سنجاوی، لورالائی اور اب پھر دکی و راڑہ ہاشم میں ہونے والے عوام دشمن واقعات سے متعلق عوام میں یہ تشویش پائی جاتی ہے کہ یہ تمام واقعات شعوری منصوبہ بندی کے ذریعے ان پشتون معدنی وسائل سے مالا مال علاقوں میں بدامنی اور لاقانونیت مسلط کرنے کی سوچی سمجھی سازش ہے ۔ بیان میں کہا گیا کہ تمام واقعات میں ملوث ملزموں کی گرفتاری کو یقینی بنا کر حکومت اپنی ذمہ داریاں بروقت پوری کرے ورنہ ان اضلاع اور علاقوں کے عوام اور تمام سیاسی جمہوری پارٹیاں متحد ہو کر احتجاجی تحریک شروع کرنے پر مجبور ہوں گی۔