دینی مدارس کومشکوک قرار دینا قابلِ افسوس ،مولانا حنیف جالندھری

ملتان (سٹاف رپورٹر) وفاق المدارس العربیہ کے ناظم اعلیٰ مولانا محمد حنیف جالندھری نے کہا کہ دینی مدارس، امن کی تعلیم دیتے ہیں ان کا کسی قسم کی دہشت گردی، انتہا پسندی اور تشدد سے کوئی تعلق نہیں، دینی مدارس کی خدمات کا اعتراف کرنے کی بجائے انہیں مشکوک قرار دینا قابلِ افسوس ہے، انہوں نے گزشتہ روز اتحاد تنظیمات مدارس کے جاری کردہ موقف کی تائیدکرتے ہوئے اربابِ حکومت کو اس پرغور اور علما کرام کو اسے عام کرنے کی درخواست کی، یادرہے کہ اتحا دتنظیمات مدارس کی جانب سے جو موقف سامنے آیا تھا، اس میں ان کا کہنا تھا کہ دینی مدارس و جامعات نے کبھی رجسٹریشن سے انکار نہیں کیا، پی ڈی ایم کی گزشتہ حکومت کے ساتھ رجسٹریشن کا فارمولا طے ہو گیا تھا، مسودہ َقانون بھی منظور ہو گیا تھااور وزیرِ اعظم نے وعدہ کیا تھا کہ اسے پارلیمنٹ سے منظورکرا کے اس پر عمل درآمد شروع کر دیا جائے گا، ہم اب بھی طے شدہ امور پر قائم ہیں،اگر ریاست کی بعض ذمے دار شخصیات مزید بات چیت کرنا چاہتی ہیں تو ہم اس کے لیے بھی تیار ہیں۔