پٹرولیم نرخ مقرر کرنے کا حکومتی اختیار آئل مارکیٹنگ کمپنیوں کو دینے کی تیاری

اسلام آباد (جنگ نیوز)پٹرولیم نرخ مقرر کرنے کا حکومتی اختیار آئل مارکیٹنگ کمپنیوں کو دینے کی تیاری ‘آج اہم اجلاس طلب ‘چیئرمین اوگرا کو لائحہ عمل تیار کرنے کی ہدایت ‘پٹرولیم مصنوعات کی قیمتیں ڈی ریگولیٹ کرنے کا حتمی فریم ورک وزیر اعظم کو پیش کیا جائے گا۔تفصیلات کے مطابق وفاقی حکومت نے پٹرولیم مصنوعات کی قیمتوں کی ذمہ داری سے نکلنے کا فیصلہ کرلیا۔ذرائع کے مطابق وزیراعظم نے پٹرولیم مصنوعات کی قیمتیں مقرر کرنےکاحکومتی اختیار ختم کرنے کی ہدایت کردی ہے۔ذرائع کا بتانا ہے کہ آئل مارکیٹنگ کمپنیوں کو مرحلہ وارقیمتیں مقرر کرنے کا اختیار دینے کی تیاری کی جارہی ہے‘وزیراعظم کی ہدایت پر وزیر پٹرولیم نے اہم اجلاس آج طلب کرلیا ہے۔ذرائع کا کہنا ہے کہ چیئرمین اوگرا کو قیمتیں ڈی ریگولیٹ کرنےکے اثرات اور لائحہ عمل بنانے کی ہدایت کی گئی ہے۔ذرائع نے بتایاکہ پیٹرولیم مصنوعات کی قیمتیں ڈی ریگولیٹ کرنے کا حتمی فریم ورک وزیراعظم کو پیش کیا جائے گا۔