اعلیٰ تعلیم کے ادارے بد حالی کا شکار ہیں،احسن اقبال

اسلام آباد(کامرس رپورٹر ) وفاقی وزیر منصوبہ بندی احسن اقبال نے کہا ہےکہ اس جدید دنیا میں بھی پاکستان میں 2 کروڑ 60 لاکھ بچے اسکول جانے سے محروم ہیں اس حوالے سے وفاقی ادارہ شماریات کو ہدایات دی گئی ہیں کہ ہر ضلع اور تحصیل کی سطح پر سکول کی بنیادی تعلیم سے محروم بچوں کا ڈیٹا اکھٹا کیا جائے تاکہ سکولوں میں بنیادی تعلیم کی شرح میں اضافہ کرنے کی حکمت عملی تشکیل دی جا سکے۔ احسن اقبال کا کہنا تھا کہ وفاقی ہائیر ایجوکیشن کا شعبہ بھی برے حالات سے دوچار ہے۔ پنجاب کی اعلی اور قدیم ترین انجینئرنگ یونیورسٹی سمیت اعلی تعلیم کے مزید تعلیمی ادارے بد حالی کا شکار ہیں ۔ انہوں نے کہا میری پوری کوشش رہی کہ پی ایس ڈی پی میں ترقیاتی بجٹ پر کوئی کٹ نہ لگے مگر عوام کو ٹیکسوں سے بچانے کے لیے ہمیں مجبوراً 300 ارب روپے کا کٹ لگانا پڑا۔ حکومت کی سوچ ہے کہ وفاقی یونیورسٹیوں کو وفاق جبکہ صوبائی یونیورسٹیوں کو صوبائی حکومتیں فنڈنگ کریں۔ بدقسمتی سے کسی بھی یونیورسٹی میں اساتذہ کو وہ مراعات نہیں دی جا رہیں جس کے وہ مستحق ہیں اسی لیے تعلیمی شعبے سے وابستہ با صلاحیت اساتذہ باہر کے ملکوں کا رخ کر رہے ہیں۔