انسانی حقوق کی خلاف ورزیوں سے متعلق آواز ایپ کا افتتاح

اسلام آباد (خبر نگار) وفاقی وزیر برائے قانون و انصاف اور انسانی حقوق سینیٹر اعظم نذیر تارڑ نے آواز ایپ کا افتتاح کر دیا۔ یہ ایک جدید موبائل ایپلی کیشن ہے جس کا مقصد انسانی حقوق کی خلاف ورزیوں کو موثر طریقے سے رپورٹ اور حل کرنا ہے۔ آواز ایپ وزارت انسانی حقوق کا ایک اہم اقدام ہے جو کہ اہم انسانی حقوق کے مسائل پر فوری ردعمل کو یقینی بناتا ہے۔ ایپ صارفین کو انسانی حقوق کی خلاف ورزیوں کو رپورٹ کرنے میں مدد فراہم کرتی ہے جس میں گمشدہ یا اغوا شدہ بچوں کے کیسز شامل ہیں۔ یہ رپورٹس فوری طور پر متعلقہ حکام کو مناسب کارروائی کرنے کیلئے بھیجی جاتی ہیں۔ رپورٹ موصول ہونے پر ایپ ایک الرٹ سسٹم کو فعال کرتی ہے جو قانون نافذ کرنے والے اداروں ، حکومتی محکموں اور کمیونٹی تنظیموں کے درمیان مربوط ردعمل کو متحرک کرتا ہے۔ افتتاح کے دوران سینیٹر اعظم نذیر تارڑ نے انسانی حقوق کے مسائل کو حل کرنے کیلئے محفوظ اور مزید ذمہ دارانہ ماحول کے فروغ میں ایپ کے کردار کو اجاگر کیا اور کہا کہ آواز ایپ کو متعارف کرانے پر فخر محسوس کررہا ہوں جو ہمارے ملک میں انسانی حقوق کے تحفظ اور انصاف کیلئے ٹیکنالوجی کے استعمال کے عزم کا مظہر ہے۔