60روپے یونٹ پر دکان اور40پر گھر نہیں چل سکتا‘وزیرمملکت

اسلام آباد (ٹی وی رپورٹ/ایجنسیاں)وزیر مملکت خزانہ علی پرویز ملک نے کہا ہے کہ ہمیں احساس ہے 60 روپے یونٹ پر دکان اور 40 روپے یونٹ پر گھر نہیں چل سکتا ہے‘خسارے آسمان سے باتیں کر رہے ہیں، اس وقت ملک میں مشکل ترین حالات ہیں۔جیو نیوز کے پروگرام جیو پاکستان میں گفتگو کرتے ہوئے علی پرویز ملک نے کہا کہ بجلی بلوں کے معاملے پر حکومت لوگوں کی تکلیف کے ازالہ کےلیےکام کررہی ہے اور اسی لیے وزیراعظم نے 200 یونٹ والے صارفین کو ریلیف دینے کے لیے 50ارب دیے مگر ان معاملات کا حل دیرپا اصلاحات ہیں۔ علی پرویز نے کہا کہ آئی پی پیز 1994، 2002 اور 2014 میں لگے، 40 خاندان والی کہانی میں جو لوگ ہیں وہ 1994 اور 2002 والے ہیں اور ان کا شیئر صرف 80 ارب ہے، اس میں اگر کسی نے چور بازاری کی تو تحقیقات ہونی چاہیے۔انہوں نے مزید کہا کہ باقی جو پلانٹس ہیں ان میں کچھ حکومتی پلانٹ کول اور آر ایل این جی پرہیں اور کچھ چائنیز ہیں مگر ان کی فنانسنگ چائنیز بینک نے کی ہے، جنہوں نے مشکل وقت میں پلانٹس لگائے انہیں ولن نہیں بلکہ ہیرو کے طور پر پیش کرنے کی ضرورت ہے‘ان مسائل کے حل کےلیے ان سے بات چیت کرنے کی ضرورت ہے ۔