تحریک انصاف پر پابندی کیلئے کافی مواد موجود ہے، وزیرقانون

اسلام آباد (آئی این پی )وفاقی وزیر قانون اعظم سینیٹراعظم نذیر تارڑ نے کہا ہے کہ پی ٹی آئی پر پابندی کے حوالے سے وفاقی حکومت کے پاس کافی مواد موجود ہے، پابندی سے متعلق وفاقی حکومت سنجیدگی سے سوچ رہی ہے، سپریم کورٹ میں ریفرنس دائر کرنے سے پہلے سیاسی اور قانونی پہلوئوں کو دیکھا جائے گا۔ان خیالات کا اظہار انہوں نے سینیٹ قائمہ کمیٹی برائے قانون کے اجلاس میں کیا ۔قائمہ کمیٹی کا اجلاس فاروق ایچ نائیک کی زیر صدارت منعقد ہوا جس میں وفاقی وزیر نے سپریم کورٹ میں ایڈہاک ججز کے تقرری پر بحث کرتے ہوئے بتایا کہ سپریم کورٹ میں عام مقدمات کی سماعت متاثر ہو رہی ہے،سپریم کورٹ سیاسی کیسز میں بہت مصروف ہوگئی ہے،سینیٹر حامد خان نے کہا کہ سپریم کورٹ نے خود اور بار نے بھی ہمیشہ ایڈہاک تقرریوں کی مخالفت کی اس پر سینیٹر ضمیر نے مطالبہ کیا کہ سپریم کورٹ پر کام کے دبائو کی وجہ سے ججز کی تعداد میں اضافہ ہونا چاہیے،ججز کی تعیناتی میں صوبوں کی نمائندگی کا بھی خیال رکھا جائے، سینیٹر انوشے رحمن نے کہا کہ مجھے آئینی عدالت کے قیام پر کوئی اعتراض نہیں ہے۔ وفاقی وزیر قانون نے بتایا کہ مقدمات کی سماعت میں تاخیر کے کئی عوامل ہیں۔ مقدمات کی سماعت میں تاخیر کا مسئلہ ججز کی کمی کی وجہ سے ہے۔کسی جج کی صلاحیت میں کمی نہیں ہے، ایسے مقدمات جو سیاسی ہوں ان کی سماعت ایک بجے کے بعد ہوا کرے۔ سیاسی اور آئینی معاملات کی سماعت کیلئے الگ عدالت ہونی چاہیے۔