اندرونی سیاسی معاملات پر کوئی پوزیشن اختیار نہیں کرتے ، امریکا

کراچی (نیوز ڈیسک) امریکی محکمہ خارجہ کے ترجمان میتھیو ملر نے کہا ہے کہ پاکستان کیلئے 10کروڑ 10لاکھ ڈالر امداد کی تجویز کی گئی ہے ہم اندرونی سیاسی معاملات پر کوئی پوزیشن اختیار نہیں کرتے ۔انہوں نے بھارت میں ریسٹورینٹس کے مسلمان مالکان کو ریسٹورینٹس کے باہر اپنا نام لکھنے کے احکامات پر بھی تنقید کی اور کہا کہ ہر ایک مذہبی آزادی ہونی چاہئے۔ ایک سوال کے جواب میں انہوں نے بتایا کہ یہ رقم جمہوریت کے فروغ اور دہشتگردی اور شدت پسندی کے تدارک اور اس کیساتھ ساتھ معاشی اصلاحات اور اس کی منیجمنٹ کیلئے استعمال ہوگی۔ انہوں نے بتایا کہ کانگریس میں ماضی میں بھی اس طرح کی امداد کی تجویز سامنے آتی رہی ہے اور اسے پاکستان کیساتھ جاری مشترکہ پروگرام کے تحت ہی استعمال کیا جائے گا۔ انہوں نے ڈونلڈ لو کی پی ٹی آئی چیئرمین کیساتھ متوقع ملاقات سے متعلق بریڈ شرمین کی ٹوئٹ کا جواب دیتے ہوئے کہا کہ وہ اس معاملے سے واقف نہیں ہیں ۔ ہم پہلے بھی واضح کرچکے ہیں کہ ہم پاکستان کے اندرونی سیاسی معاملات پر کوئی پوزیشن اختیار نہیں کرتے ۔ ہم جمہوریت اور انسانیت کے احترام پر یقین رکھتے ہیں۔